Váldogádjunbálvalus

Mearra- ja áibmogádjunbálvalusa jođihit ja koordinerejit oppaáigge goabbá nu váldogádjunguovddáš. Dáhpáhusaid koordineren nannámis delegerejuvvo dábálaččat muhtin guovllu gádjunguovddážii (dárogillii LRS).

Mátta-Norgga Váldogádjunguovddáš (dárogillii HRS S-N) lea biddjon lahka Stavanger girdigietti Sola. Guovddáža ovddasvástádusguovlu lea Skagerak rájes gitta 65 gráda rádjái davvin. Máddin lea HRS S-N ovddasvástádus Ruoŧa ja Dánmárkku rájáid rádjái, ja oarjin Stuorrabritannia rádjái. Guovddážis lea maiddái bajimuš ovddasvástádus buot gádjunbálvalusain nannámis Trøndelága rájes máttás.

Davvi-Norgga Váldogádjunguovddáš (dárogillii HRS N-N) lea biddjon Bodeddjui. Guovddáža ovddasvástádusguovlu lea 65 gráda rájes davvin gitta Davvipola rádjái. Oarjin lea rádjá 0-meridiána ja nuortan Norgga-Ruošša rádjá, ja muhtin muddui davvi davvi-nuorttas gitta dassái go deaivá 35 nuorta guhkkodatgráda. Das čuovvu rádjá 35 gráda gitta Davvipolii. HRS N-N bajimuš ovddasvástádus lea maiddái buot gádjunbálvalusaide nannámis Nordlándda fylkka rájes davás, ja fátmmasta maiddái Svalbardda.

Guktot váldogádjunguovddážat ásahuvvojedje čakčamánu 1. beaivve 1970. Guovddážat leat iehčanas organisašuvnnalaš ovttadagat, njuolgga Justisa- ja gearggusvuođadepartemeantta vuollásaččat, ja guktuin lea iežas operašuvdnalatnja. Váldosivvan dasa ahte mis leat guokte váldogádjunguovddáža Norggas, lea dat go dát galget leat goabbat guoibmáseaskka back-up várás, ja dan sivas lea guovddážiid gaskkas lagas ovttasbargu. Dát danin vai buoremusat sáhttet ávkkuhit guovddážiid ollislaš kapasitehta. Guovddážiid lea ásahan nu ahte dat galget gádjunakšuvnnain sáhttit leat doarjjan nubbi nubbái, ja bahámus dilis váldit badjelasas nuppi guovddáža doaimma jos dat gahččá eret.

Váldogádjunguovddážiid bajimuš jođiheaddjit davvin ja máddin leat Nordlándda politiijaguovllu politiijameašttir, ja Mátta-Oarje politiijaguovllu politiijameašttir. Politiijameaštáriidda lea delegerejuvvon váldi leahkit HRSa gádjunjođiheami jođiheaddjin. Doaibma lea lassin dasa ahte lea iežas politiijaguovllu jođiheaddji.